聖誕交叉BLOG:牛市股神特別醒, 熊市燈神特別多

一年容易又聖誕，最好嘅當然係玩大鐵鎚嘅聖誕交叉 blog 啦。市場維京人嘅第一個 blog 係講股票嘅，喺度都係忍唔住要講下個市。如果冇興趣，可以去 iPhone 維京人 ，睇下最新嘅 SimCity on iPhone 有幾好玩都得，哈哈。

回顧番上年 2007年呢個時候，恆指啱啱由十月份嘅高位三萬二千點左右大幅回落至約兩萬六千點。跌幅雖然大，但睇番 2007年年頭恆指只不過喺萬八點左右升上嚟，一年埋單計數其實升唔少，約有8000 點。既然賺錢咁容易，市面瀰漫住一股好濃厚嘅消費意欲。當其時大家仲覺得個市跌咗咁多，應該差唔多啩。仲有唔少人諗住入貨博反彈。

四叔當其時仲好睇好，雜誌有人訪問佢話睇好中人壽同埋碧桂園。呢嘢真係牛市股神特別醒，熊市燈神特別多。

2008年好幾個百年一遇原來同時間可以喺一年入面發生，包括內地雪災、四川地震、北京奧運、雷曼破產、XX萬億救市方案等等等等，股市瀉到阿媽都唔認得，今年入市如果唔係做淡真係心都實，可以講話由頭跌到尾。好彩臨尾呢兩個月阿爺又幫手同出口，力撐香港。

老實講，雖然阿爺出晒飲奶嘅力撐港，但內地個市其實家下好嚴峻。自己都未攪掂，仲要出多14 招挺港，睇嚟都係望梅止渴居多。特區政府班子其實又點會唔知吖，如果唔係阿唐唐都唔駛走出嚟食碗麵俾你睇，落力叫人如果有能力就適當消費駛多 D 錢。

仲有幾日2008年就會玩完，2009年如無意外第一季應該會如大家估計一樣：衰到貼地。家下有 D 口痕友話香港越衰，阿爺俾嘅 JETSO 就越大。唉，睇嚟回歸呢幾年大家都變咗伸手派。香港仔 (或女)，唔該幫幫忙爭氣，唔係嘅話阿爺睇唔過眼最多唔鬼睬你。

小弟一如既往喺自己個 blog 度 講持續睇淡，恆指有機會未來半年有機會見四位數。當大家睇到個市冇乜希望之時，就係名副其實嘅寒冬，至於會唔會係「深寒」，就真係要過埋年先至喇。嚟緊呢年阿爺要慶祝六十大壽，咁就緊係希望可以安然渡過啦。估計2009年會係波濤洶湧嘅一年，因為經濟差同埋救市呢兩大力量會互相鬥法，相信短炒都係小注算數。

喺度祝各位有個愉快嘅聖誕節同埋新年！唔知邊個 blog 會咁唔好彩登呢篇交叉 blog post 呢？

Merry X'mas and Happy New Year! Cheers!

by: 市場維京人